মই তোমাৰ প্ৰেমত পৰিছো নেকি

  মই তোমাৰ প্ৰেমত পৰিছো নেকি

সুগন্ধি নিৰিবিলিৰ পদূলিত
এই যে ভাবি আছো তোমাৰ কথা
মই তোমাৰ প্ৰেমত পৰিছো নেকি? মন মগজু শিহৰিত কৰা প্ৰশ্নটো
যেতিয়াই আমনি কৰে
মই আকাশলৈ চাওঁ
সোণালী জোনটিৰ সলনি
তুমিয়েই যেন জিলিকি আছা
মিঠা মিঠা অনুভৱৰ কল্লতৰু হৈ

আহিনৰ ৰিমজিম ৰিমজিম এজাক কোমল বৰষুণত
অথবা ফাগুণৰ এছাটি মলয়া বতাহতো
তুমিয়েই প্ৰেৰণাৰ উৎস সৰোবৰ

মই দেখিছোঁ
অনুভৱৰ জিলমিল ঘাঁহনিত বহি
তুমি মোৰ সতে কথা পাতিছা
হাঁহিছা খেলিছা
মাজে মাজে অভিমানো কৰিছা
আকাশীগংগা হৈ বৈ গৈছা নিৰৱধি
মই তোমাৰ প্ৰেমত পৰিছো নেকি ?

অহো! তুমিওতো এটা শিল্প
প্ৰেমৰ সেউজীয়াৰে অংকিত
নিৰ্লোভ ভাস্কৰ্য্য
তোমাৰ প্ৰেমত নপৰাকৈ
কোনোবাই থাকিব পাৰে জানো ?

–  মেহেনাজ সৰকাৰ (mehanassarkar33@gmail.com)